La vita è davvero una poesia, con questo ultimo articolo del 2023, voglio augurare un felice anno ai lettori e alle lettrici di questa rubrica, con la speranza nel cuore che questa meravigliosa poesia che è la vita, ci regali i beni di cui la nostra anima necessita
‘A vita è na Poesia
‘A vita è na Poesia,
ca l’ amma mparà a memoria,
senza paura da scurdà,
pecché infondo se po’ sempe arripiglià.
L’ importante è ca’ sta storia,
‘a scrivimmo cu’ cuscienza,
c’ ‘o core mmano,
e senza scienza,
ma cu l’ anema appicciata,
pecché ‘a putimme leggere,
pure quanno ‘o sole s’è stutato
Auguri
Ve lasso nu saluto,
pe’ chist’anno ormaie fennuto,
v’augurasse gioia e serenità,
pe’ chist’anno che verrà,
ma po’ abbandono sta pensata,
accussì me scanso na mazziata,
ma ‘o pensiero ‘o faccio ‘o stesso,
nun v’ ‘o dico, e che so’ fesso!
‘O nnasconno senza ‘o fa sapé;
buon anno nuovo a me e a te
Fra me e me
Che t’ ‘o dico a fa,
si’ te penso sempe,
ma tanto che pô cagnà?
Luntana staie e niente vuò sapé,
e sti cose ca’ te dico,
so’ sulo parole ca’ rummaneno ncuorpo a me.
Che t’ ‘o dico a fa,
tu nun ce staie,
a che serve a c’arraggiunà!
Me dico: mo’ ‘a scrivo,
ma tanto nun me rispunne,
pò me vesto pe’ te vení a cercà,
ma è troppo forte ‘o dolore,
‘e chi sape ca’ tanto niente pô cagnà
Bona furtuna
Bona furtuna,
sî nun truove pace,
pe’ na guerra ca’ nun è fennuta;
p’ ‘a giustizia ca’ se n’è iuta,
e pe’ chi se trova ‘ncopp’ a na croce.
Bona furtuna,
a te ca’ te ne staie ienno,
a chi riesce sempe a guardà ‘a luna,
pure quanno ‘o cielo sta chiagnenno.
Bona furtuna,
a te ca’ vaie a prià,
a te ca’ nun te faie fermà a nisciuno,
pe’ dà na mano a chi nun riesce a campà.
Bona furtuna,
a chi crede ancora a l’ ammore,
a chi sape ca’ senza Dio nun è nisciuno,
e a chi quanno parla ce mette sempe ‘o core
