Poesia Napoletana
In questo primo articolo dell’anno, desidero anzitutto porvi i miei più sinceri auguri per un anno nuovo ricco di gioie e benedizioni. Desidero offrirvi alcune mie poesie inedite in lingua Napoletana, sperando di fare cosa gradita al vostro cuore. Siamo sempre lieti delle nostre origini Napoletane e Flegree, e torniamo a rispolverare la buona usanza di leggere il nostro passato attraverso le poesie, che nella nostra terra, brillano di una luce intensissima e particolare. Vi auguro una buona lettura, viva la poesia Napoletana!
Via Tribunali, Napoli
Ve lassasse nu saluto,
pe’ chist’anno ormaie perduto,
v’augurasse gioia e serenità,
pe’ chist’anno che verrà,
ma po’ abbandono sta penzata,
accussí me scanso ‘na mazziata,
ma ‘o penziero ‘o facc’ ‘o stesso,
nun v’ ‘o dico, e che so’ fesso!
M’ ‘o stipo senza sapé,
bon’anno nuovo a me e a te.
Salita del Petraio
M’hȇ itto:
core sta luntano,
e m’hȇ tenuto ‘a mano,
primma ‘e me lassà.
Ma i’ nun ce credo,
no nun ce credo,
tenive l’uocchie ‘e chianto,
e mo stu core affranto,
nun ‘o ssaccio cunzulà.
Che dice, è ‘a verità?
overo m’hȇ lassato?
me rimane sta pietà,
ma ‘o core tuoie vo’ bene a n’ato.
Stuta stuta sta cannela,
ca na fiamma è già appicciata,
allumma pure quanno è sera,
st’anema in pena disgraziata;
ammore è nu viento ‘e primmavera.
Napoli, veduta dalla certosa di San Martino
Vierno curioso,
me pare n’estate accamuffata,
te faie frisco ‘a matenata,
po’ te scarfa ‘int’ ‘a jurnata,
sarraie venuto zitto zitto,
pe’ lassarce nu capriccio,
e chi ‘o capisce,
chi va stuorto e chi va lisce,
dince almeno pe’ capì,
comme c’amma po’ vestì,
‘e stu periodo può penzà,
nun è cosa a c’ammalà,
vieno almeno tuosto tuosto,
cammenammo co cappotto,
ma si’ invece faie ‘o ‘nsisto…
i’ c’ ‘o dico a Giesù Cristo.
Posillipo
Tu me diceste no,
e i’ te dicette sì,
po’ tu me diciste sì,
e i’ te dicette no,
mo stamme in parità,
fermammoce stavota,
sultanto pe’ ce vasà,
po’ accuminciamme n’ata vota.
Santa Maria alla Sanità, affresco del V secolo, Napoli, chiesa di Santa Maria, quartiere Sanità
È l’otto ‘e Dicembre,
juorno ‘e l’Immacolata,
tutte stanno addenucchiate,
pe’ ‘na grazia a mammà nosta.
‘Na guagliona sulo sta allerta,
annanza ‘a statua ‘e mammà,
cu ‘e braccelle stise e aperte,
le dice: mamma fatte abbraccià.
E a gente se risente:
comme nun s’addenocchia!
è sulo ‘na prepotente,
nuie simmo fedele fino all’uocchie,
ma ‘a guagliona s’avota e dice:
sì overo, so’ prepotente,
ma faciteme sta pietà,
a fora ‘e chesto nun tengo niente,
nè mamma e nè papà,
vuie site sante, bona gente,
veri fedeli, pe’ carità,
i’ m’aggio sulo ‘mparato ca mamma mia è chesta ccà.
Attilio Pratella: pittore Napoletano, golfo di Napoli
Scetate fenesta,
arapete e famme mmirà,
chella bella fantasia,
ca nun me fa campà.
Se chiamma Assunta o Maria?
Cuncettina? O chi sa!
So’ malato ‘e gielusia,
famme vedè addò sarrà.
Alluongame ‘a veduta,
nun me dicere ca no,
nun ‘a veco, se n’è iuta?
Dimme dimme addò sta mo?
‘A vi lloco Cuncettina,
Assunta o Marì,
a tengo sempe a me vicina,
e che vulite, so’ accussì.
Fenesta affatata,
mo te lasso chistu core,
pe’ chella bella ‘nnammurata,
ca pure si’ te chiude, ‘a sento ancora.
