Un caro saluto ai lettori e alle lettrici di questa rubrica, vi lascio alla visione delle seguenti poesie, testi freschi di scrittura, che ho composto nell’ ultimo giorno di questa settimana. Un ringraziamento a tutti/e, e sempre viva la poesia Napoletana
Nuove poesie
Urgenza
Tengo n’urgenza ca’ nun saccio spiegà,
m’arrevot’ ‘a capa e nun me fa raggiunà.
‘A nuttata m’ ‘a fa janca e scura ‘a matenata,
m’accumpagna quanno esco
e s’appresenta â retirata,
ce l’ aggio itto a nu prevete ma nun ce sta che fa,
pure l’amice me risponneno: che vaie dicenno, nun ce penzà.
Po’ aggio interrogat’ ‘o core giusto pô sapé,
finalmente l’ aggio capito,
chesta urgenza riguarda a te
Core ‘nnammurato
Tu me guarde e io te guarde,
amm’ancora accumincià,
po’ te tocco e tu t’avuote,
io me fermo pe’ t’aspettà.
Nun te fide e chist’ammore,
e faie ‘a ‘nzista pe’ ‘nce penzà,
ma sî me siente core a core,
truove ‘a forza ‘e ce pruvà.
L’ ammore nun è cosa ca’ se pô raggiunà,
nun riesce a fa ‘o restivo,
cchiú ‘o cummoglie e cchiú ‘o siente alluccà.
Ma io te guardo e tu me guarde,
stamme ancora ‘mbarazzate,
chi c’ ‘o dice a chesta bella,
core mio s’ è ‘nnammurato.
Ricordo
Bella, carnale, vocca gloriosa,
pelle abbronzata, femmena cianciosa,
m’arricordo ‘e chillu juorno ca’ sî stata ‘nzieme a me,
che mumente amma passato,
nun m’ ‘e scordo cchiú t’ ‘o giuro,
chillu cuorpo ‘ncantato,
chella cosa scura scura,
quanti notte t’aggio sunnata,
quanti juorne t’aggio perduta.
Canzone
Quanno vene ‘a stagione,
e fresca è ‘a nuttata,
me saglie ‘mpietto na canzone,
c’ addiventa serenata.
Eppure canta chistu core,
chiuso ancora ‘int’a na gabbia,
chi dice è canto d’ ammore,
chi dice ch’ è rabbia,
io v’ ‘o giuro nun ‘o saccio,
chello che vô significà,
saccio sulo ca’ ‘int’ a sti braccia,
tenga ‘a smania ‘e cantà,
sarrà pecché ‘a stagione m’arricorda ‘e na persona,
sarrà pecché stu core,
assumiglia a na canzone
‘A sumiglianza
Tu assumiglie a chelli cose,
ca’ nun riesce a spiegà,
chelli cose ca’ stanno ‘nzino,
e nun c’a faie a le scurdà.
Na cosa ca’ sî ce pienze,
ce pienze overamente,
na specie ‘e malatia,
ca’ nun t’accire e nun leva niente.
Tu sî chella parola,
‘ncopp’ ‘a ponta da lengua,
‘a pienze na vota sola,
e te fa sango,
ma da capì nun riesce ancora.
Tu sî na rosa o giesummino?
nun ‘o ssaccio ma che ‘mporta,
facc’io ‘o ciardiniere e tu faie ‘o ciardino
